Tuesday, September 7, 2010

ဤစာအုပ် (ဒုတိယတွဲ ဦးရန်အောင်၏အမှာ)

ဤစာအုပ်

၁၉၅၉-ခုနှစ်တွင် ဦးစပ်စု၏ “ထူးတဲ့စပ်စု”အမည်ရှိစာအုပ် ပထမတွဲကို ထုတ်ဝေခဲ့ဖူးသည်။

ထိုစာအုပ်ထုတ်ဝေရန်အတွက် ဦးစပ်စုက သူ့ကိုယ်တွေ့ဖြစ်စဉ်ဖြစ်ရပ်များကို လုံးစေ့ပတ်စေ့ စိတ်ရှည်လက်ရှည်ပြောပြသည်။ ယင်းသို့ ဦးစပ်စုပြောသည်ကို မောင်လေးကရေးသားရာ ကျွန်တော်က ပြင်ဆင်တည်းဖြတ်ပေးခဲ့သည်။

ဦးစပ်စုမှာ တရုပ်နိုင်ငံ(ပြေကြီး)တွင်မွေးဖွားခဲ့ပြီးနောက် ၁၃-နှစ်သားအရွယ်တွင် ဗမာပြည်သို့ ရောက်လာကာ တောကြိုအုံကြား လယ်သမားအလုပ်သမားတို့နှင့်အတူ အလုပ်ကြမ်းအမျိုးမျိုးကို လုပ်ကိုင်ခဲ့ ဖူးသည်။ ထို့နောက်ရန်ကုန်သို့ရောက်လာကာ အထက်လွှာအောက်လွှာ အလွှာပေါင်းစုံမှ လူအမျိုးမျိုးတို့နှင့် တရင်းတနှီးပေါင်းသင်းဆက်ဆံခဲ့ဖူးသည်။ ထို့ကြောင့် ဦးစပ်စုမှာ ဘ၀လည်းစုံ၊ ဗဟုသုတလည်းလုံလောက်လျက် သူ့ဘ၀နှင့်အတွေ့အကြုံများကို “ထူးတဲ့စပ်စု”ဟူသော အမည်ဖြင့်စာအုပ်ထုတ်ဝေရာ၊ ထိုစာအုပ်မှာ ပုဂိ်္ဂုလ်အသီးသီး သတင်းစာအစောင်စောင်တို့၏ ချီးကျူးခြင်းခံရသည်။

ထူးထွေဆန်းကြယ် အံ့သြဖွယ်သောဖြစ်စဉ်ဖြစ်ရပ်များကို မပြောပဲမနေနိုင်သလို၊ မရေးပဲမနေနိုင်သော ဦးစပ်စုသည် ၁၉၆၃-ခုနှစ်တွင် “၇၅-နှစ်အကြား၊ ၄၉-နှစ်အမြင် (ဗမာပြည်)” ဟူသော စာအုပ်ထူးကို ထုတ်ဝေပြန်သည်။

ထိုစာအုပ်ပါ အကြောင်းအရာအချက်အလက် ကိုယ်တွေ့ဖြစ်စဉ်ဖြစ်ရပ်များကို ဦးစပ်စုကပြောပြ၍၊ ကျွန်တော်၏တပည့်မြင့်ထွန်းကရေးသားပြီးလျှင် ကျွန်တော်ကပြင်ဆင်တည်းဖြတ်ကာ ရိုက်နှိပ်ပေးရသည်။ ထုတ်ဝေဖြန့်ချိမှုတာဝန်ကိုကား ဦးစပ်စုကိုယ်တိုင်ဆောင်ရွက်သည်။

ထိုစာအုပ်မှာ နာမည်နှင့်လိုက်လျောစွာပင် ဗမာပြည်အကြောင်းကို ၇၅-နှစ်တိုင်တိုင်ဦးစပ်စု ကြားရခြင်းများနှင့် သူကိုယ်တိုင် ၄၉-နှစ်တိုင်တိုင်မြင်တွေ့ရပုံများကို ရေးသားထားသည်။

ပို၍ထူးခြားပုံမှာကား တရုပ်ပြည်နှင့်အိန္ဒိယပြည်တို့၏ နယ်နိမိတ်အရေး ရှုပ်ထွေးအငြင်းပွားလျက် နေသည့်ကာလတွင် တရုပ်နှင့်အိန္ဒိယချစ်ကြိုးသွယ်ရန် မေတ္တာပေါင်းကူးတံတားတည်ဆောက်ပေးခြင်း ဖြစ်သည်။

ထိုစာအုပ်မှာ ရောင်းမလောက်အောင်တွင်ကျယ်လှသည်ဟု ကြားရ၏။ ယခုတဖန် လာပြန်ချေပြီ။ ဦးစပ်စု၏ “ထူးတဲ့စပ်စု” ဒုတိယတွဲဖြစ်သည်။ ပထမတွဲတွင်မပါ ကြွင်းကျန် အင်မတန်အရေးကြီးသည့် ဖြစ်စဉ်ဖြစ်ရပ်များကို ဒုတိယတွဲအဖြစ် ရိုက်နှိပ်ခြင်းဖြစ်၏။

ဦးစပ်စုသည် သူ၏ဘ၀တစ်သက်တာ စိတ်ဝင်စားစရာတွေကို စိတ်ရှည်လက်ရှည်ပြောပြရာ မြင့်ထွန်းက ဂရုတစိုက်သေချာကျနစွာ နားထောင်မှတ်သားသည်။ ထို့နောက်စာပေဖြစ်အောင် ရေးသားသည်။

ဦးစပ်စုမှာ ဗမာတိုင်းရင်းသားဖြစ်သော်လည်း ပြေကြီးပေါက်ဖြစ်သဖြင့် ဗမာစကားပြောရာတွင် တရုပ်သံဝဲလှသည်။ ထို့ကြောင့် သူ့စကားကိုအဓိပ္ပါယ်ပေါက်အောင်နားထောင်ရခြင်းမှာ ကျောက်စာဖတ်ရခြင်းနှင့် ဆင်ဆင်တူသည်။ မြင့်ထွန်းသည် ဦးစပ်စု၏ပြောပြချက် နှုတ်ထွက်ကျောက်စာကို စကားပြေဖြစ်အောင် ရေးသားသူဖြစ်ရာ ဗဟုသုတပေးသူဦးစပ်စုနှင့် ပြန်လည်ရေးသားသူမြင့်ထွန်းတို့ကို ကျေးဇူးတင်ထိုက်လှပေသတည်း။

ရန်အောင်


၂၉-၅-၆၃

No comments:

Post a Comment